赛前车路士同李斯特城分别输咗畀锡菲联同埋般尼茅夫，曼联今场赢波就可以升上排行榜第三位，可惜事情永远都唔会咁顺利，红魔喺补时阶段失守最终畀修咸顿迫和2:2，白白错过咗呢个争四慨领先优势。
球员表现评分：
David de Gea迪基亚
评分: 6
早段失慨第一球唔怪得迪基亚，而渠之后都做过几次精彩慨扑救，可惜最后补时都要失第二球波。呢球角球轨迹较接近小禁区，但系迪基亚选择咗留喺门线前唔出迎，明显并唔系一个好慨决定，而明显高空传中始终都系迪基亚慨弱点。
顺带一提今场系迪基亚代表曼联慨第400场比赛，可惜唔能够以赢波嚟做结局。
Aaron Wan-Bissaka云比沙卡
评分: 6
全场都忙住钳制对手慨左翼列蒙(Nathan Redmond)，有几次唔错慨拦截，但系对进攻冇乜特别慨参与同贡献。
Victor Lindelof连迪路夫
评分: 6
今场表现都尚算系稳健，除咗有好几次中途拦截亦负责清咗好几球波，不过最后争顶输咗畀对手奥巴菲美(Michael Obafemi) 导致失波。
Harry Maguire麦佳亚
评分: 5.5
今场表现明显对唔住8000万镑慨身价，第二球失波入面更加唔知点解要喺前柱位置揽住队友云比沙卡，亦冇尝试起跳顶走个波，搞到漏咗去后柱畀人顶入。
Luke Shaw梳尔
评分: 6.5
传咗球单刀波畀队友拉舒福特(Marcus Rashford)，可惜拉舒福特越位在先。表现系防线入面较好慨一个，可惜比赛尾段受伤被换出。
Nemanja Matic马迪
评分: 6.5
表现唔算亮眼但系依旧为曼联中场带嚟稳定性，喺保持控球同埋中场防守上作出唔少贡献，亦继续为普巴(Paul Pogba) 同埋般奴费南迪斯( Bruno Fernandes) 慨中场组合带嚟平衡。
Paul Pogba普巴
评分: 5
开场早段喺自己禁区顶位置畀对手艾格斯(Danny Ings) 偷咗个波导致球队早早落后，其实上一场普巴已经试过相似慨失误。
喺整体进攻上慨贡献亦唔算亮眼，未能够抵消所犯慨错误，比赛中段就被换走。
Bruno Fernandes般奴费南迪斯
评分: 6
虽然今场冇办法延续加盟后慨精彩表现，不过都成功交出一个助攻畀队友马斯亚(Anthony Martial)。
Mason Greenwood格连活特
评分: 5.5
今场唔系好搞得掂对手慨左闸贝特兰(Ryan Bertrand)，表现好静焗，比赛尾段被换走。
Marcus Rashford拉舒福特
评分: 7
为曼联攻入追平慨一球，亦有一球被判越位在先慨单刀入球，喺队友格连活特同埋中场表现麻麻之下，同马斯亚配合支撑住曼联慨进攻。
Anthony Martial马斯亚
评分: 8
马斯亚成功喺队友恩哈路(Odion Ighalo) 身上偷师，渠竟然喺禁区入面成功控球，背向龙门护波并交出一个助攻传送畀队友拉舒福特，的确系喺马斯亚身上少见慨能力。
随后马斯亚更加延续近几场慨脚风，喺左边切入中路起脚劲射破网，为曼联系上半场反超前。不过同时亦都错失过黄金机会，冇办法为球队拉开比数。
后备上阵
Fred费特
评分: 6
后备上阵代替表现令人失望慨普巴，除咗为曼联中场带嚟能量之外并冇乜特别表现。
Brandon Williams班顿威廉斯
评分: 6
后备上阵代替受伤慨梳尔，可惜之后亦都受伤离场，虽然仲有一个换人名额但系已经用尽三次换人次数，令到补时阶段曼联要喺打少一个之下作赛。
Scott McTominay麦汤文尼
评分: N/A
比赛去到83分钟先被换入代替般奴费南迪斯以加强防守，不作评分。
Daniel James丹尼尔占士
评分: N/A
比赛去到83 分钟先被换入代替表现麻麻慨格连活特，不作评分。
————————————————– –
今场曼联唔单止冇办法延续前几场慨气势，失分之余更加增添咗梳尔同埋班顿威廉斯两个伤兵，可以话系赔了夫人又折兵。曼联左闸人选并唔多，希望两位伤势唔会太严重，唔系慨话对余下慨赛事影响都会几大。